СУРУНКАЛИ ЮРАК ЕТИШМОВЧИЛИГИ ВА ҚАНДЛИ ДИАБЕТ КОМОРБИД ҲОЛАТЛАРИДА КАСАЛЛИК ПАТОГЕНЕЗИНИНГ ЎЗИГА ХОС ХУСУСИЯТЛАРИ.

Аннотация

Юрак-қон томир касалликлари одатда қандли диабет (ҚД) каби хавф омилларидан бошланади. Вақт ўтиши билан бу ҳолат қон томирлар шикастланишига (васкулопатия), миокард фаолиятининг бузилишига олиб келади ва охир-оқибат юрак-қон томир ўлими билан якунланиши мумкин. Қандли диабет юрак етишмовчилиги (ЮЕ) ривожланиш хавфини 2–4 баробар оширади. Шунингдек, қандли диабети бўлган юрак етишмовчилиги беморларида касаллик кечиши ва прогноз ушбу касаллик бўлмаган беморларга нисбатан анча оғирроқ бўлади. Қандли диабет миокард ишемиясини ҳам микро-, ҳам макроваскулопатия орқали келтириб чиқаради ва шу билан бирга юрак мушагига тўғридан-тўғри зарар етказади. Гипергликемия, гиперинсулинемия ва инсулинга резистентлик қон томирларининг нормал гомеостазини бузади. Бу жараён азот оксиди ишлаб чиқарилиши камайиши ва реактив кислород шакллари кўпайишига олиб келади, натижада яллиғланиш кучаяди. Ушбу ўзгаришлар атеротромботик жараёнларнинг ривожланиши ва миокард дисфункциясини чуқурлаштиришга сабаб бўлади. Ҳозиргача нейрогумораль ва метаболик механизмларга таъсир этувчи дори воситалари чиқарилиш фракцияси пасайган юрак етишмовчилигида ўлим ва касалланиш кўрсаткичларини камайтиришда самарали экани исботланган. Шунинг учун бундай беморларга клиник тавсияларга мувофиқ тўлиқ медикаментоз терапия тайинланиши шарт.